असंच काही दिवसांपूर्वी मराठीमधील एका प्रसिद्ध गाण्याचं विडंबन सुचलं.
प्रसिद्ध गाणं आहे - खेळ मांडला (चित्रपट - नटरंग)
ह्या गाण्याची चाल तुम्हाला सगळ्यांना ठाऊक असेलच. जर नसेल तर वरच्या संकेत-स्थळावर (link) गाण्याचे बोल आणि YouTube चित्रफित (Video) आहे. हे जे खाली विडंबन आहे ते त्याच चालीत म्हटलं तर त्याची मजा आहे.
भात सांडला...
दोन वाट्या तांदूळ आणि ४ वाट्या पाणी
त्याच्याबरोबर खायला तूप आणि लोणी
कुकर ठेवला गॅसवर नी बघत राहिलो टी.व्ही.
शिट्ट्या झाल्या पंधरा आणि भात उतू जाई
सगळेजण वाट पाहत होते जेवणाची
पण माझा हात फाटका...
भात सांडला, सांडला, सांडला
आई... भात सांडला.
सांडला गं डाळ-भात कारट्या तू सगळा
तूच कर जेवण आता भात सांडला
दे रे देवा अक्कल, असा कसा हा वेंधळा
ह्या किचनच्या उंबऱ्यात भात सांडला
फुस्फुसली शिट्टी भरपूर, उडाला भात सगळा
ओघळली भुईवर डाळ, कुकरही झाला काळा
फडकं घे पुसायाला, साबण आणि पाणी घे
भाताचं ते एक-एक शित नीटपणे टीप्पून घे
वाया गेलं जेवण, सगळे झाले कासावीस
शेवटी मग आले बाबा...
मला हाणला, हाणला, हाणला
कारण... भात सांडला.
- पुष्कर कुलकर्णी
